त्रिभुवन विमानस्थलको सञ्चार उपकरणमा समस्या

चैत १०, काठमाडौं । त्रिभुवन अन्तर्राष्ट्रिय विमानस्थलको सञ्चार उपकरणमा समस्या आएपछि बिमान उडान अवतरण केही समय प्रभावित भएको छ । बिहान ६ बजेदेखि उपकरणमा समस्या देखिएपछि उडानमा केही समय प्रभावित भएको विमानस्थल कार्यालयले जनाएको छ ।

विमानस्थल कार्यालयका अनुसार राडारमा समस्या देखिएको हो । “लाइनमा ट्रिप गएपछि समस्या देखिएको थियो । राडारमा समस्या देखिँदा केही समय उडानमा समस्या भएको थियो । तर, अवतरणमा समस्या भएन,” विमानस्थल कार्यालयलका प्रवक्ता टेकनाथ सिटौलाले भने, “पाँचपाँच मिनेटको अन्तरमा हामीले उडान गर्यौं । अहिले समस्याको समाधान भइसकेको छ ।”

उपकरणमा समस्या देखिएपछि विमानस्थल कार्यालयले वैकल्पिक व्यवस्थाका लागि नोटाम जारी गरेको थियो । नोटाम जारी गरे पनि उडान र अवतरणमा खासै प्रभाव पर्न नदिएको उनले बताए । अहिले पनि नोटाम खारेज गरिएको छैन । केही समयपछि मात्रै नोटाम खारेज गरिने उनले जानकारी दिए ।

विमानस्थल कार्यालयका प्रमुख प्रेमनाथ ठाकुरले बिहानको समयमा मौसममा पनि केही समयस्या रहेको बताए । अहिले सामान्य अवस्थामा विमानस्थलमा उडान तथा अवतरण भइरहेको उनले जानकारी दिए ।